السؤال الحقيقي | الحلقة 17
قبل ما تصيفط هاد الحلقة لشي واحد جاك على بالك، حلّ لائحة المكالمات ديالك. وشوف آخر مرة عيّطتي لشي معرفة فإدارة، بغيتي تعرف فين توقف فالصفّ، ولا بغيتي ما توقفش فيه؟
كتكون ماشي على رجليك فشي زنقة فتطوان ولا مرتيل ولا..، كتلقى طوموبيل طالعة فوق الرصيف. كتهبط للطريق، كتدوز من حدّ المراية ديالها وكتقول «واش حتى نمشي على رجلي خاصني نطلب الإذن؟ فين هي الجماعة؟». عندك الحق. غير البارح، ملي كنتي أنت بالسيارة وبغيتي تشري الخبز، فين وقفتي؟ آه، فالصفّ الثاني. وشعلتي الفلاشر. «غير دقيقة ونجي».
ديك الدقيقة عندك هي الوقت اللي خذا مول المخبزة باش يصرف ليك 100 درهم. عند السيد اللي سدّيتي عليه، هي الوقت اللي بقى فيه كيكلاكسوني وانت ما سمعتيه. وعند الأم اللي جبرت الرصيف مسدود بطوموبيل بحال ديالك، هي هبطة بعربة ولدها للطريق، ودارت تشوف واش ماجية شي طوموبيل، وعاد تفتش على بلاصة منين تقدر تطلع. أنت رجعتي شريتي الخبز سخون.. وهي اللي تقدر تحكي لينا الباقي..
وفممرّ الراجلين، كتبدّل الحكاية على حساب فين واقف. كتدخل للممر الراجلين، الطوموبيلات كتحبس، وفالنصّ كيصوني التليفون. كتنقص الخطوة، كتشوف شكون عيّط، وكتجاوب «آه، فينك؟». من حقّك تقطع، واللي كبير فالسنّ، واللي كيتعكّز، واللي شادّ وليدو من يدو، كل واحد ياخد الوقت اللي خاصّو. غير أنت، اللي كنتي مزروب حتى وصلتي لنصّ الطريق وعاد بان لك الوقت باش تكمل المكالمة، خصنا نعرفوا واش كتقطع الشارع ولا خرجتي تتمشّى فالكورنيش؟
العشية كترجع لنفس الممرّ وانت شادّ المِقود. واحد السيد حطّ رجلو فالخطّ البيض. عينك جات فعينو، دزتي قدّامو بحال البرق ورفعتي ليه يدك من مور الزاج «سمح ليا آ الحاج، ا طو سيدي !». هو رجّع رجلو للور. إيوا إلا شفتيه باش تعتاذر ليه، راه شفتيه حتى باش تحبس ليه.
سقسي شي واحد فينا «علاش ما وقفتيش؟». الهضرة كتبدا فممرّ الراجلين فتطوان، وقبل ما يكمل السيد تقطاع الطريق نكونو وصلنا للرباط. «هادي ما هي والو! سير شوف آش كيعملو الكبار وما كيهضر معاهم حدّ!». ويجيب ليك بنكيران وأخنوش والمنصوري، وانت باقي حدا الشرجم. واخّا آ صاحبي، نحاسبو كل واحد على قدّ المسؤولية ديالو. غير كمّل لينا هاد اللولة. ملي داك الراجل رجّع رجلو للور، شكون كان سايق؟
قدّام الشباك، حنا ثمانية كنتسناو. دخل التاسع، سلّم على الموظف باسميتو وداز قبل منّا. كنشوفو فبعضياتنا «ها علاش هاد البلاد ما كتزيدش القدّام». من بعد بنهار عندنا غرض فإدارة أخرى. قبل حتى ما نشوفو شحال ديال الناس فالصفّ، كنخرجو التليفون «آ فلان، واش باقي كتعرف شي حدّ تما؟». وملي كنخرجو كنعاودو نعيّطو «الله يعمّرها دار، كون ماشي أنت كون بقيت تما للصباح». وداك السيد اللي بقى تما من بعد ما سبقناه، بشنو كيتفكّرنا هو؟
وفالضريبة حتى هي عندنا جوج دفاتر ديال الحساب. كاين اللي بصّح ما قادرش يخلّص، وهو أول واحد كيضرّو ملي الدعم كيمشي لغيرو. وكاين اللي فجيبو باش يخلّص، وعندو ألف سبّة باش ما يخلّصش. جرّب تسقسيه شحال كيجيه مجموع كيسان القهوة وأتاي وباكيات الڭارو فالعام. «وآش دخّلك؟ فلوسي هادي». عندو الحق، حرّ ففلوسو. ولكن نهار عمّر ورقة الدعم وصرّح غير بنصّ المدخول، داك النصّ الآخر فين مشى؟ وعلاش ملي سمع أن شي واحد ميسور استفد من الدعم، هو أول واحد كتب «خاصّ التحقيق»؟
وكاتبقى هديك الجملة اللي كنقولوها بصوت هابط «بلاتي، نمشي ندبّر على داك السيد يفكّني». يفكّك من آش بالضبط؟ يشرح ليك المسطرة؟ الله يجازيه بخير. أما إلا كانت ناقصاك ورقة وبغيتيه يدوزها، ولا المخالفة عملتيها وبغيتيه يمحيها، ولا حطّيتي ليه شي حاجة فإيدو باش يغمّض عينيه، علاش ملي كتحكيها لصحابك كتقول «تسلكات»؟ كون حكاها ليك شي واحد آخر، عارف مزيان شنو كنتي تسمّيها.
من حقّنا نسقسيو الرئيس على الصفقة، والوزير على الوعد، والجماعة على الحفرة اللي داز عليها الشتاء والصيف. واللي كيدخل المصلحة ديالو فقرار كيخصّ المدينة، من حقّ الناس يسقسيوه على تضارب المصالح ويطلبو منّو الحساب. حتى واحد ما يجاوب المواطن اللي سقسى على المال العام بـ«سير أنت الأول صلّح الوقفة ديال طوموبيلتك». ولكن حتى ديك السيدة اللي سبقناها فالصفّ عندها الحق تسقسينا، وباش نجاوبوها ما محتاجين لا نجيبو وزير لا نفتشو على عذر فشي حكومة.
ويمكن هنا الواحد فينا يضحك ويقول على راسو «الحمد لله اللي ما مكّنّيش فالأرض». ساهل نتخيّل راسي مسؤول عادل وأنا جالس فالقهوة، ما عندي لا ميزانية لا توقيع. غير البارح كان عندي مِقود، وكان القرار كامل بيدي، وداك السيد اضطرّ يرجّع رجلو للور. هاديك حتى هي مرة كان فيها شي واحد كيتسنّى العدل منّي أنا.
دابا آ سي «كامل الأوصاف تمشي»، رجع لديك النمرة اللي فتّشنا عليها فأول الحلقة. إلا مشيتي غدّا، ولقيتي الصفّ طويل والموظف قال ليك «تسنّى نوبتك بحالك بحال الناس»، واش تقدر تقول «الله يعمّرها دار، هادا هو المعقول»… بنفس الخاطر اللي قلتيها بها للي دخّلك البارح قبل من الناس؟

